Gin-emphasize ni Department of National Defense (DND) Secretary Gilberto “Gibo” Teodoro Jr. ang importansya sang pagrespeto sa International Law kag pagpabakod sang security cooperation sa ginpatigayon nga 13th ADMM-Plus sa Lapu-Lapu City, Cebu, sang Hwebes, Oktubre 29, 2026.
Sa iya speech sa pag-atubang sa mga tiglawas nagikan sa ASEAN kag sa mga dialogue partners sini, ginpahayag sang tiglikom ang tatlo ka mga nagapanguna nga prayoridad agud iduso ang kalinong, stability kag seguridad sa rehiyon sang Indo-Pacific.
Kalakip sa mga prayoridad nga ini ang pagsunod sa United Nations Charter at 1982 United Nations Convention on the Law of the Sea (UNCLOS), pagpabakod sang maritime security cooperation, kag ang pagprotekta sa mga migrant workers kag seafarers sa tunga sang pangkalibutanon nga krisis.
Gingamit man sang tiglikom ang kahigayunan agud nga ipanawagan ang paghugpong sang mga pungsod sa pagsiguro sang food security kag energy security batok sa mga pamahog kag pagpanghangkat sa global supply chain.
Ginhatagan man sang importansya ni Teodoro ang crucial nga papel sang international community sa pagprotekta sa kinatamatarong sang mga Overseas Filipino Workers (OFWs) kag mga marino nga may dako nga kontribusyon sa World economy, ilabi na sa tion armed conflict kag emerhensya sa nagkalain-lain nga pungsod.
Ginpatigayon ang nasambit nga paghinun-anon sa Cebu bilang kabahin sang nagapadayon nga pag-host sang Pilipinas sa mga serye sang dayalogo sang ASEAN subong nga tuig.
Nagserbe ang probinsya para sa pagtililipon sang mga defense ministers kag security leaders nagikan napulo ka pungsod sa rehiyon kag ila nagapanguna nga dialogue partners kaangay sang United States, China, kag Japan.
Katuyuan sang paghinun-anon nga ini ang pasanyugon ang diplomacy kag estoryahan ang mga mainit nga geopolitical issues kaangay sang seguridad sa West Philippine Sea kag ang kalinong sa bug-os nga Indo-Pacific.
