Nadakpan sang mga otoridad ang tatlo ka mga persona sa ginpatigayon nga operasyon batok sa ilegal nga pagbaligya sang sigarilyo sa Barangay Old Namangka, banwa sang Mabinay, Negros Oriental, sang Oktubre 29, 2026.
Ginpatigayon ang operasyon nga ginatawag nga OPLAN MEGASHOPPER sang CIDG Negros Occidental Provincial Field Unit bilang lead unit, kaupod ang nagkalain-lain nga support units.
Nadakpan sa operasyon ang tatlo ka suspek nga ginkilala sa mga alyas nga May, Bryan, kag Hernan.
Ang mga ini amo ang gin-alegar illegal nga nagabaligya sang sigarilyo nga wala sang nagakaigo nga Graphic Health Warning ukon GHW kag BIR Tax Stamps.
Narekober sa operasyon ang madamo nga master cases sang nagkalain-lain nga brand sang sigarilyo, lakip ang Three Star American Blend, King Pen American Blend, kag Casablanca Premium.
Narekober man sang mga otoridad ang isa ka cellphone, isa ka puti nga Nissan Urvan, kag isa ka puti nga Isuzu D-Max.
Ang nakumpiskar nga mga produkto sang sigarilyo ang nagabalor sang 5, 265, 000.00
Suno sa mga otoridad, ang mga suspek nadakpan samtang aktuwal nga nagabaligya sang nasambit nga mga produkto paagi sa buy-bust ukon entrapment operation.
Ginapatihan nga nagalapas ang mga ini sa Republic Act 10643 ukon Graphic Health Warnings Law, Republic Act 9211 ukon Tobacco Regulation Act of 2003, kag sa National Internal Revenue Code.
Wala man sang may ginpakita ang mga suspek sang nagakaigo nga mga dokumento nga nagapamatuod nga legal ang ila pagbaligya sang nasambit nga mga produkto.
Ang mga suspek yara na sa kustodiya sang mga otoridad samtang ginahanda ang nagakaigo nga kaso nga ipasaka sa Prosecution Service.
