Nagpanawagan si President Ferdinand “Bongbong” Marcos Jr. sa mga bag-o nga katapo sang Bangsamoro parliament nga magserbisyo sa mga pumuluyo nga may pagpaubos kag pasidunggan ang mga nagpakigbato para sa kalinong paagi sa good governance.
Ini, kadungan sang pagtambong sang Presidente sa inaugural session sang Bangsamoro Autonomous Region in Muslim Mindanao (BARMM) Parliament sa Bangsamoro Government Center sa Cotabato City.
Ginpahayag ni Marcos nga ang una nga session sang BARMM parliament ang indi lamang kadalag-an sang Mindanao, kundi sang bug-os nga pungsod.
Ginhatagan man pagtamod sang Presidente nga ang kahiwatan nagaserbe nga milestone sa peace process sa tunga sang pungsodnon nga gobyerno kag sang Moro Islamic Liberation Front (MILF), halin sa armado nga pakikibaka tubtob sa malinong nga demokratiko nga pagdumala.
Apang, ginpahayag sang presidente nga ang dalan padulong sa inaugural session ang ginlaragway nga “long and painful,” sa diin madamo nga pamilya ang nag-antos kag nadulaan sang pinalangga sa sulod sang mga tinuig nga tensyon.
Nagpasalig man si Marcos nga ang gobyerno ang magapadayon sa pagpasangkad sang mga oportunidad sa ekonomiya para sa Mindanao, kag magapadayon sa pagsuporta sa otonomiya sang Bangsamoro.
Ang BARMM ang nagpatigayon sang una nga parliamentary elections sang Septyembre 14, nga may final voter turnout nga 84.34%, nga nagarepresentar sang 2,018,478 ka mga botante gikan sa 2.39 million registered voters.
