Amat-amat na nga nagadamo ang mga nagapadu-aw sa ila minatay sa Handumanan Public Cemetery, Oktubre 31, besperas sang tigkalalag.
Sa interview sang Bombo Radyo Bacolod kay Sunday Villarosa, caretaker sang Handumanan Public Cemetery, sa Nobyembre 1 tubtob 2 gid ang ginalauman nila nga pagdagsa sang mga bisita.
Suno diri, nagadangat sa 10,000 ang mga nalubong sa nasambit nga sementeryo.
Sila ang nagabukas halin alas-6:00 sang aga kag tubtob na lamang sa alas-8:00 sang gab-i.
Una naman nga nagpaninlo sa sementeryo ang General Services Office (GSO), upod sa Public Order and Safety Office (POSO), kag City Legal Office; samtang kaina, may mga nagbulig naman nga mga personnel gikan sa Bacolod Environment and Natural Resources Office (BENRO).
Ini agud mahawanan ang tuman ka siot nga sementeryo antes ang pagdugok sang mga bisita.
Pahanumdom ni Villarosa nga wala ginapahanugutan ang pagsulod sang mga vendors sa sementeryo, kag sa designated vending area gid lamang makaplastar.
Sa mga magadu-aw sa minatay, pahanumdom man sini nga ginadumilian ang pagdala sang matalom nga butang kalakip na ang pala kag guna, kag bawal man ang lighter, sa baylo sila ang ginapahanugutan magdala sang posporo sa pagsindi sang kandila.
Panugyan man niya nga dal-on na ngadaan ang tanan nga kinahanglan agud indi na magbalik-balik ilabi na nga lauman nga mangin magutok ang Handumanan Public Cemetery sa tigkalalag.
