Nagbilin sang mga pahanumdom ang Department of Health – Negros Island Region (DOH-NIR) sa mga magadu-aw sa ila minatay sa UNDAS 2026 karun nga may ara sang El Niño phenomenon.
Sa interview sang Bombo Radyo Bacolod kay DOH-NIR Assistant Regional Director Adrian Hort Ramos, sa amat amat nga pagdamo sang mga nagapadulong sa sementeryo, isa man sa dapat panilagan amo ang tuman nga kasakit nga silak sang adlaw.
Panawagan sini sa mga magapadulong sa patyo partikular na sa adlaw nga mangin hydrated kag magbalon gid sang mainom nga tubig.
Ginarekomendar man ang paggamit sang insect repellant partikular na sa mga kabataan agud indi makagat sang mga lamok kag malikaw sa dengue.
Samtang kun magkaon sang mga peche-peche kaangay sang kakanin, dapat ipahanumdom man sa mga kabataan nga maghugas gid sang kamot, maggamit sang alcohol ukon sanitizer agud malikawan ang cross contamination.
Pahanumdom man sini sa magadu-aw sa ila minatay nga ipabilin ang katinlo sa sementeryo kag ihaboy ang mga basura sa husto nga halabuyan.
Indi man pagkalimtan ang maintenance kun may ginabatyag kaangay sa highblood.
Apang kun mahimo, mas maayo nga magbisita sang temprano samtang indi pa masakit ang init, ukon sa tion nga maghandong na sa hapon tubtob sa gab-i.
Apang kun sa tungang adlaw lamang ang tion sa pagdu-aw, ginarekomendar niya nga makadali lamang magbulad sa init.
Samtang sa pagsulod sa sementeryo, dapat man nga tandaan kun diin ang entrance kag exit kasubong man ang ginahamtangan sang mga emergency responders agud mahapos makapangayo sang bulig sa tion sang emerhensya.
Napaidalom na sa Code White Alert ang tanan nga ospital subong nga UNDAS 2026.
