Luyag ni Senate President Pro Tempore Vicente “Tito” Sotto III nga may yara sang maathag nga pagsulundan agud masolbar ang madugay kag indi otorisado nga pag-absent sang mga senador sa ila nga mga katungdanan.
Ini ang matapos i-file ni Sotto ang Senate Resolution No. 751 nga naga-ayo sa Senate Committee on Rule nga repasuhon ang mga pagsulundan kag magrekomenda sang mga tikang agud nga masabat ang prolonged unauthorized absences nga mga miyembro sang Senado.
Sa resolusyon, gin-emphasize ni Sotto nga ang pag-uyat sang pampubliko nga posisyon ang isa ka pagsalig nga ginhatag sang mga pumuluyo gani nagakadapat lamang nga mangin responsable ang mga election official kag tumanon ang ila nga katungdanan.
Suno sa resolusyon, nangin problema ang madugay nga pag-absent bangud mahimo indi makatambong ang isa ka senador sa importante nga buluhaton sang Senado.
Ginhinambit man sa Senate Resolution ang mga reklamo nga i-file batok sa pila sa mga senador bangud sa ila nga pag-absent apang wala sang maathag nga probisyon sa Senate Rules kun paano ini masolbar.
Bangud sini, luyag ni Sotto nga may yara sang mas maathag nga mekanismo agud nga masiguro nga magapabilin nga accountable ang mga senador sa ila nga mga responsibilidad bilang mga tiglawas sang pumuluyo.
