Magapamangkot pa ang alkalde sa Cadiz City kun sa diin sarang magamit ang P20 million financial aid gikan disaster rehabilitation and reconstruction assistance program funds sang Malacañang.
Sa interview sang Bombo Radyo Bacolod kay Cadiz City Mayor Salvador “Bading” Escalante, malaba ang listahan nga ginsumiter nila sa Office of the Civil Defense – Negros Island Region.
Ginlakip nila diri ang mga nagkalaguba nga balay, mga public infrastructure kaangay sang health facilities, eskwelahan, covered court, sea wall, kag iban pa.
Bangod sa kalaba sang listahan, luyag sini nga maseguro kun sa diin lamang sarang magamit ang pondo ukon diin sa mga nalista ang gin-aprubahan nga mahatagan sang pondo.
Dugang pa ni Escalante nga ini ang pondo sang National Government kag indi niya luyag nga magka-violation ang ciudad sa pag-alokar sang pondo.
Suno diri, lakip sa iya ginsumiter ang mga nagkalaguba nga balay, kag kun siya lamang ang masunod, ini ang luyag niya nga unahon.
Apang indi ini segurado kun kalakip sa magamitan sang pondo ang paghatag sang financial aid sa mga nagub-an sang balay.
Suno diri, masobra 300 ka balay ang nareport nga totally damage, samtang masobra 12,000 naman ang partially damaged.
Nahatagan na nila sang financial aid ang mga totally damaged kag pila sa mga partially damaged ang balay.
Pahayag ni Escalante nga luyag niya nga bisan isa ka tuig na ang nakaligad, mahatagan man ang mga nagub-an sang balay, nga kalakip man sa ginpromisa sadto.
Pasalig sang alkalde nga magahatag ini sang update kun may-ara na sang development, kag kun madownload na ang pondo.
