Ginapanugyan sang Bureau of Jail Management and Penology – Negros Island Region (BJMP-NIR) sa mga district jails ang paghatag sang mas malawig nga tion sa pagtinir sang mga persons deprived of liberty (PDLs) sa gwa sang pasilidad bangod mahimo tuman ka init sa sulod sang selda karun nga may Super El Niño.
Sa interview sang Bombo Radyo Bacolod kay Jail Senior Inspector Atty. Juniven Rey Umadhay, Chief sang Legal Service Section kag Spokesperson sang BJMP-NIR, una na nga nagdagdag sang memorandum si BJMP-NIR Director Jail Chief Superintendent Brendan Fulgencio sa mga jail warden nga magkoordinar kag magdihon sang kasugtanan sa mga local water supplier agud maseguro nga may magamit nga tubig sa jail facility.
Deriktiba man sini nga makahimo sang coordination sa ospital, clinic, kag disaster offices sa kada local government unit para sa mas madasig nga access inkaso may-ara sang nagakinahanglan sang medical attention.
Pasalig naman ni Umadhay nga dugay-dugay man ang pagpatigayon sang monitoring sang jail nurses sa health condition sang mga PDLs.
Samtang ang BJMP-NIR ang naga-supply man sang bulong sa kada district jail.
Suno diri, ang mga narecord ang mga ordinaryo lamang nga balatian kaangay sang mga trangkaso, hilanat, ubo, kag sip-on.
Ang mga may TB naman ang ginaseparar sang selda.
Pahayag ni Umadhay nga may electric fan man sa mga selda, apang may ara sang mga jail facilities nga congested gid, kalakip na ang sa Bacolod City kag Silay City.
May mga congested jail facilities naman nga nagagtukod na sang mas malapad nga pasilidad kaangay sa San Carlos City nga gikan sa 120 tubtob 150 PDL capacity, ang mangin 800 PDL capacity.
Ang mga electric fan ang gindonar sang local government units, non-government organization, kag ang ulihi ang gikan sa Integrated Bar of the Philippines – Negros Occidental chapter.
