Gindeklarar nga dead on arrival sa ospital ang isa ka motor rider nga senior citizen matapos aksidente nabungguan sang mini dump truck sa bahin sang National Highway sakop sang Barangay Sto. Niño sa banwa sang EB Magalona, Sabado sang hapon, Nobyembre 7.
Ginkilala ang biktima nga si Reynaldo, 65-anyos, residente sang amo nga banwa; samtang ang driver sang truck nga ginapanag-iyahan sang EB Magalona Local Government Unit amo si Jason, 35-anyos, nga residente sang Talisay City.
Sa interview kay Police Major Rhea Sara Villanueva, hepe sang EB Magalona Municipal Police Station, nagausoy sang pareho nga direksyon ang truck kag motorsiklo apang pag-abot sa palikuan sang pasulod sa Barangay Santo Niño sa nasambit nga banwa, gina-alegar, hinali nga naglusot ang motorsiklo sa kilid sang truck, rason nga aksidente ini nabungguan; nag-agum si Reynaldo sang pilas sa bahin sang iya ulo kag lawas nga nagresulta sang iya kamatayon.
Suno kay Villanueva, inisyal na nga nakaestoryahanay ang pamilya sang biktima kag ang truck driver.
