Duha sa mga una nga ginalauman nga testigo sa depensa ni Vice President Sara Duterte ang indi makatambong sa pagbukas sang ila nga presentasyon sang ebidensya sa impeachment trial subong nga Lunes, Nobyembre 9.
Suno kay House lead prosecutor kag Batangas 2nd District Rep. Gerville “Jinky Bitrics” Luistro, nagbalibad nga mag-testigo si constitutional law professor Ralph Sarmiento agud mapabilin ang iya impartiality bilang legal scholar.
Indi man makatambong si Atty. Suzette Balucanag-Punay, corporate counsel sang GenCorp Industries Inc. kag Metro City Chow Foods Corp., bangud sa natalana sini nga MRI.
Siya kuntani ang magapresenta sang mga dokumento natuhoy sa mga korporasyon kag negosyo nga ginaangot kay Duterte.
Ginpahayag ni Luistro nga mauna nga ipresenta sanday Davao City Assessor Jaime Adalin, Island Garden City of Samal Assessor John Kenneth Enumerables, kag Matina Crossing Barangay Chairperson Cindy Colina para sa depensa.
Sila ang ginalauman nga magpaathag sang mga tax declaration kag mapa sang mga ginakwestyon nga mga propiedad sang prosecution.
Nauna na nga ginpresenta sang House prosecution ang mga titulo kag deed of sale sang duha ka propiedad nga gina-alegar wala nagasanto sa mga deklarasyon sa SALN sang Bise Presidente.
