Ginkwestyon sang Secretary General sang Alliance of Concerned Teachers – Negros Island Region Union ang pagpanghatag sang Department of Education (DepEd) sang 172,000 Macbook laptops para sa mga manunudlo sa baylo nga ipatukod sang mga classrooms kag ibakal sang electric fan sa tunga sang nagakaekperyensyahan nga heat index tuga sang El Nino.
Sa interview sang Bombo Radyo kay ACT NIR Union Secretary General Grace Abellar, bisan nga dapat pasalamatan ang paghatag sang gobyerno sang 172,000 laptops sa mga manunudlo, indi sa gihapon ini kaigo para sa masobra 972,000 nga mga manunudlo sa pungsod.
Dugang pa sini, tuman ka mahal sang brand sang ginpanagtag nga laptop kag ini ang exclusive kag mabudlay ang pagtransfer sang mga files.
Pwede man kuntani suno sa iya makabakal sang barato kag quality nga laptop nga mas mahapos nga maggamit sang mga manunudlo.
Ginkwestiyon man sini ang P7.42 billion nga budget para sa pagbakal sang laptop nga suno sa iya, mahimo kuntani gamiton sa pagpatukod sang mga classrooms ukon pagbakal sang mga electric fan ilabi na subong nga nagakaeksperyensya sang El Nino kag mataas nga heat index.
Dugang pa ni Abellar, dapat napreparahan na sang gobyerno ang epekto sang summer season kag sang El Nino agud masiguro ang proper ventilation sa mga eskwelahan.
Suno diri, gahambal lang ang gobyerno nga unahon ang kalidad sang edukasyon apang wala man ini gina-ubra.
Bangud suno sa iya, mas dako pa ang budget sa Department of Public Works and Highways apang gincut ang bugdet para sa edukasyon.
Panindugan sini nga dako ang kakulangan sang gobyerno tapos sa ulihi ang manunudlo ang ginabasol.
Nanawagan si Abellar sa gobyerno nga unahon ang kinahanglanon sa edukasyon agud kun may kalamidad mapadayon sa gihapon ang pagtuon sang mga estudyante kag mapabilin ang kalidad sang edukasyon.
