Nadakpan na ang suspect nga nagbuno-patay sa isa ka cook sa circumferential road sa Brgy Taculing, Bacolod City.
Madumduman nga ginbawian sang kabuhi ang biktima nga si Alyas Edmar matapos ginbuno sang suspect sang nagtambag sa nagluntad nga komosyon sa gwa sang ilimnan.
Sa interview sang Bombo Radyo kay Police Captain Glen Montano, Station Commander sang Bacolod Police Station 6, ang 18-anyos nga suspect ang ginkilala nga si alyas “Kiki”.
Siya ang nadakpan sa iya puluy-an sa Don Juliana, Brgy Taculing kasunod sa ginpatigayon nga follow up investigation kag hot pursuit operation sang kapulisan pasado alas-2:00 kahapon sang hapon.
Suno kay Montano, alas-11:00 sang gab-i naghagaday ang biktima upod ang abyan nga mag-inom.
Pasado alas-3:00 sang kaagahon, nag-abot ang grupo sang pamatan-on nga ginlakipan sang apat ka mga lalaki kag duha ka babayi.
Nagbaisay ang mga ini tubtob nga may nagluntad na nga komosyon, gani sila ang ginsaway ni Edmar kag ginlampos ang pulungkuan.
Didto na nabun-an sang suspect ang biktima sa liog.
Nagtinguha pa ini nga magpadalagan antes natumba.
Ini ang ginbawian sang kabuhi sa ospital, alas-4:00 sang kaagahon.
Suno kay Montano, ginakompleto na nila an mga dokumento sa pagpasaka sang kaso nga homicide batok kay alyas “Kiki”.
Mensahe sini sa mga nagaplano nga mag-inom sang makahulubog nga ilimnon nga mas maayu sa pribado nga lugar ukon sa sulod balay agud malikawan ang kaangay nga insidente.
