Liwat nga ginkumpirmar kag gin-athag ni Naga City Mayor Leni Robredo ang desisyon nga indi na magbalik pa sa national government kag suno diri wala na sang makapabag-o pa sa iya nga desisyon.
Ini ang iya ginpahayag sa isa ka press conference sa Naga City sang Lunes, Nobyembre 9, sa tunga sang nagapadayon nga panawagan sang pila ka mga anay kaalyado kag tagasuporta sini nga siya ang liwat nga magpadalagan sa mas mataas nga posisyon para sa 2028 national elections.
Suno kay Robredo, madugay na ini niya nga nadesisyunan kag indi sini luyag nga gamiton ang pagka-alkalde bilang temporaryo nga tikang sa paghanda para sa posible nga pagpapili sa masunod nga eleksyon.
Suno pa sa alkalde, apisar indi na ini maglaot pa sa ikaduha nga termino bilang mayor sang Naga City, wala gihapon nagakahulugan nga magabalik siya sa pungsudnon nga politika.
Gin-ako man sang anay bise presidente nga base sa iya kaugalingon nga paghangop, nakita sini ang pila ka mga limitasyon sa iya ikasarang nga mag-atubang sa komplikado nga dalagan sang national politics.
Madumduman nga nagserbe si Robredo bilang bise presidente humalin sang 2016 tubtob 2022 kag nagpadalagan sa pagka-presidente sang 2022 elections, kun sa diin napierde siya ni President Ferdinand Marcos Jr.
