Nabatun na sang Negros Occidental High School (NOHS) ang 81 ka mga macbook gikan sa Department of Education Central Office.
Sa interview sang Bombo Radyo Bacolod kay Dr Cheryl Tondo, school principal sang NOHS, nagadangat sa masobra 400 ang mga manunudlo sa buluthuan, kalakip na ang night class kag senior high school.
Suno diri, santo sa requirement, ang makabatun lamang sang macbook amo ang mga may teaching loads.
Apang bangod 81 lamang ka units ang ginhatag, nadesisyonan nila nga ang hatagan lamang amo ang mga wala nakabatun sang nakaligad nga pagpanagtag sang laptop sang si Vice President Sara Duterte pa ang Education Secretary.
Samtang ginpakamaayo man nga ang mga yara na sa serbisyo sa School Year 2025 tubtob 2026 amo ang makabatun.
Aminado ini nga namag-uhan ang iban sa mga manunudlo sa paggamit sang macbook, apang ginapakamaayo niya nga nagabuligay man ang mga ini sa pagtudlo.
Suno kay Tondo, ginpahangop nila sa mga nakabatun nga ang macbook ang gamiton lamang para sa instructional purposes.
Tinutuyo sini nga mapahapos ang pagtudlo sa mga kabataan, paagi sa pagpresentar sang visual aid para mas mahapos mahangpan sang mga estudyante.
Ginalauman nila nga ini ang magaresulta sa mas maayo nga academic performance.
