Napulo ka mga empleyado sa Negros Occidental Provincial Capitol ang nagpositibo sa confirmatory drug test sang Department of Health (DOH).
Sa interview kay Provincial Administrator Atty. Rayfrando Diaz, ang 14 ka empleyado nga gikan sa mga district hospitals ang una nagpositibo sa random drug test kag sang ginpaidalom sa confirmatory test, napulo ang nagpabilin nga positibo, isa ang nag negative kag may tatlo nga pending pa ang resulta.
Ang mga empleyado nga una na nga nag-test positive sa tion sang random drug testing nga ginpatigayon sang October, ang ginabug-usan sang 1,962 provincial government personnel nga na-assign sa pito ka provincial hospitals kag Economic Enterprise Development Department (EEDD) sa Mambukal.
Ang mga nagpaidalom sa random drug testing ang mga empleyado sa Teresita Lopez Jalandoni Provincial Hospital, Cadiz District Hospital, Lorenzo D. Zayco District Hospital, Don Salvador Benedicto District Hospital, Gov. Valeriano Gatuslao Memorial District Hospital, Hinoba-an District Hospital, kag EEDD-Mambukal.
Suno kay Diaz, ginapausisa sa karun kun permanent, Contract of Service ukon Job Order ang mga nagpositibo nga mga empleyado.
Sa pagsulundan, sin-o man nga Contract of Service kag Job Order nga nagpositibo sa drug test, ang automatic nga kakas sa serbisyo samtang, ipaidalom naman sa rehabilitation program sa mando sang Civil Service Commission ang mga regular nga empleyado.
