Nagapanawagan ang Sangguniang Panlungsod sa Bacolod sa mga gas station nga magsunod sa ginapatuman nga fuel price adjustments.
Sa interview sang Bombo Radyo Bacolod kay Bacolod City Councilor Al Victor Espino, chairperson sa Committee on Laws and Ordinances, ang presyuhanay ang nakabase sa presyo sa world market.
Madumduman nga sang Martes, ginpatuman ang mega rollback sa presyo sang gasolina nga P16.80.
Apang nakalab-ot sa ila ang pila ka mga reports nga may mga gas station nga wala nagsunod sa gintalana nga price adjustment sang Department of Energy.
Nagpasar na sang resolusyon ang konseho para sa estrikto nga price monitoring kun sa diin ginapanawagan sa Bacolod City Price Monitoring Council, City Legal Office, kag Business Permits and Licensing Division nga magcoordinate sa DOE kag Department of Trade and Industry angot sa mga madakpan nga wala nagasunod sa mandato.
Panawagan ni Espino sa mga makakita sang gas station nga wala nagasunod sa fuel price adjustment nga picturan kag ireport sa DOE.
Samtang aminado man ini nga may complaint ang iban nga mga fuel station sa panindugan nga mahal pa sang nabakal nila ang supply, samtang may-ara man sang ginatago ang ila nga stocks kag nagabutang na lamang sang signages nga “out of stock” agud ini ang mabaligya kun magsaka na ang presyo sang gasolina.
Apang pahanumdom ni Espino nga ini ang mandato sang DOE kag dapat sundon, gani kun may reklamo ang mga gas station, dapat sila ang magpadala sang formal complaints sa nasambit nga national agency.
