Patay ang 50 anyos nga back rider sang tricycle matapos mahulog sa highway sang gin-atake sang cardiac arrest sa Purok Mahogany, Barangay Crossing Pulupandan, Negros Occidental alas-4:42 sang gab-i sang Miyerkules.
Ginkilala ang biktima nga si alyas “Omar”, lalaki, single, nga residente sang Purok Proper, Valladolid.
Samtang ang driver sang tricyle amo si alyas “Boknoy”, 53 anyos, lalaki, kasado kag residente sang Purok Kalubihan, Brgy. Paloma, Valladolid.
Sa interview sang Bombo Radyo kay PCpt Rowell Peniero, hepe sang Pulupandan Municipal Police Station, ang tricyle nga may karga nga sako sang bugas ang nagbiyahe halin sa Bago City padulong sa banwa sang Valladolid.
Suno kay Peniero, santo sa panaysayon ni Boknoy, sila ang halin sa trabaho kag magapauli na kuntani sang hinali lang nga nahulog si alyas “Omar” sa tricycle.
Gilayon siya nga nagpangayo sang bulig.
Dead on arrival si Omar sa Ospital.
Suno kay Peniero, naggwa sa resulta sang post-mortem examination sang biktima nga cardiac arrest ang gintunaan sang kamatayon sini kag indi ang pagkahulog sa motorsiklo.
Suno diri, si Omar ang nag-inom sang mabugnaw nga tubig antes nagbiyahe kag nalipat man ini magtumar sang iya maintenance.
