Arestado ang isa ka lalaki matapos nga ginkawat ang kwarta sa sulod sang donation box sang St. Catherine of Alexandria Cathedral sa Dumaguete City sang Lunes sang aga, Nobyembre 16.
Ginkilala ang suspek kay alyas Bob, 48 anyos kag residente sang Dawin, Negros Oriental.
Sa interview sang Bombo Radyo Bacolod kay Patrolman Sherwin Yangzon, Assistant Investigator sang Dumaguete City Police Station, base sa impormasyon nga nakuha sini, nakita sang security guard sang simbahan ang ginhimo sang lalaki kun sa diin naggamit ini sang stick nga may adhesive agud nga makuha ang kwarta nga yara sa sulod sang donation box.
Suno kay Yangzon, samtang ginakuha ni alyas Bob ang kwarta sa donation box nakita naman siya sang gwardiya sang Cathedral kun sa diin gin-aresto ini.
Natigayon naman nga mabalik ang P700 nga donasyon matapos nga marekober ini sang mga kapulisan.
Natalana naman nga iga-release si alyas Bob matapos sang reglementary period.
Gin-engganyo man sang mga nagresponde nga kapulisan si Rev. Msgr. Robert A. Bongoyan nga magpasaka sang kaso batok sa suspetsado apang nagpamalibad ini kag ang luyag lamang sini nga ma-detain kag marekord ang insidente.
Ang background sang suspetsado ang padayon pa nga gina-verify sang mga kapulisan.












