Bago City Police Station, ginlaragway ang mga tattoo sang bangkay nga nasulod sa garbage bag nga mahimo makatumod sa identity sang biktima
-- ADVERTISEMENT --

Nagapanawagan ang hepe sang Bago City Police Station sa mahimo nakakilala sa bangkay sang lalaki nga nasulod sa garbage bag kag nakapacking tape, nga ginapatihan ginhal-id sa Prk Kapayas, Brgy Pacol, Bago City pasado alas-5:00 kaina sang aga.

Sa interview sang Bombo Radyo Bacolod kay Police Lt Col James Latayon Jr, may-ara sang tattoo ang lalaki nga biktima.

Ini ginalakipan sang pangalan nga “Rose Mary” sa iya nga dughan, kag “Cardeñas Pablo” sa nawala nga butkon.

Hulaton pa sang mga ini ang autopsy report sang SOCO sa pagtumod sang mga samad sang biktima.

Sa inisyal, ini ang wala sang panapton sang ginsulod sa garbage bag, kag preska pa ang dugo sa iya nawong kag lawas.

-- ADVERTISEMENT --

Nakaduct tape man ang iya nga bibig, samtang may nakahigot nga nylon sa iya nga lawas.

Wala man sang nabatian nga lupok sang armas-luthang sa area, gani ginapatihan nga ginhal-id lang sa lugar ang bangkay.

Samtang may nasiplatan man nga isa ka pickup sa lugar kapin ala-1:00 tubtob alas-2:00 sang kaagahon.

Suno kay Latayon, ang pinakamalapit sa ginbilinan sang bangkay amo ang isa ka arocera nga kapin 500 meters ang distansya.

Ginalantaw nila nga mahimo kaangay man sa nakaligad nga ginbilin lamang sa area ang bangkay.

Suno diri, wala sang reported nga missing person sa Bago City bangod ang nalocate man nila ang nakaligad nga ginreport.

Sila ang magapakig-angot man sa Negroc Occidental Police Provincial Office (NOCPPO) Investigation Section, agud ma cross matching ang biktima sa mga missing person sa nagkalainlain nga bahin sang probinsya.

Panawagan man nila sa mga pumuluyo sa lugar nga maghatag sang impormasyon kun may nahibaluan nga makabulig sa imbestigasyon.

Samtang kun may missing naman nga himata, makig-angot lamang sa ila, para mapadasig ang pagtumod sang identity sang biktima.