Isa ka programa ang ginpatigayon sa Andres Bonifacio Elementary School 1 sa ciudad sang Bacolod kaina sang aga kadungan sang pagdumdom sang ika-159 nga birth anniversary ni Gat Andres Bonifacio subong nga Nobyembre 30.
Suno sa principal sang ABES 1 nga si Lolita Cabahug, pila ka mga konsehal sang ciudad kag pila ka mga civic organizations ang nagtambong sa programa.
Kadungan sang pagdumdom sang birth anniversary ni Bonifacio, ginapaalinton sang ABES 1 suno kay Cabahug nga gin-usik sang baganihan ang iya kabuhi agud nga maaguman sang Pilipinas ang kahilwayan nagikan sa kamot sang mga nagsakop nga Kastila.
Nagalaom si Cabahug nga disiplinahon sang mga ginikanan kag mga manunudlo ang mga kabataan nga wala na sa karon sang armas para sa maduguon nga inaway kundi magaaway batok sa kapigaduhon, economic crisis kag health.
Suno sa principal, nagsakripisyo ang mga kabataan sa sulod sang duha ka school year bangud sa COVID pandemic gani tuman ang kalipay sini nga ginapatigayon na sa karon ang full face-to-face classes kadungan sang 159th birth anniversary ni Bonifacio.
Nagalaom man ini nga indi lang pagdumdumon sang kada Pilipino ang kaisog sang mga baganihan kundi ikabuhi ini kag mangin kabahin sang pag-umwad sang komunidad.
