Ginpanugyanan sang isa ka abogado ang mga grupo nga nagaprotesta batok sa Joint Venture Agreement (JVA) sa tunga sang Bacolod City Water District kag Prime Water Infrastructure Corporation nga magpasaka sang reklamo sa Office of the Ombudsman sa baylo nga magpatigayon sang hublag-protesta.
Sa interview sang Bombo Radyo Bacolod kay Atty. Jomax Ortiz, sarang pa mapunggan ang JVA kun magpadangat sang panumbungon sa Ombudsman ukon sa Regional Trial Court nga may jurisdiction sa cause of action.
Suno kay Ortiz, gamiton nga rason sang mga grupo ang kakulang sang transparency sang BACIWA kun sa diin nalimbungan ang mga kunsimidor sa kaundan sang ila mga ginhisugtan.
Paathag sini, sarang makapasaka sang reklamo bisan wala sang Terms of Reference nga uyat ang mga tagreklamo baliskad sa ginpahayag ni Jacelo Salpan, miembro sang Board of Directors sang Employees Union sang BACIWA nga wala sila nagpasaka sang reklamo sa korte bangud ini nila uyat ang nasambit nga dokumento.
Handa man si Atty. Ortiz nga mag-amot sang P5,000 agud makapangita sang abogado ang mga grupo para mapasaka ang reklamo.
Nagpanugyan man ini sa mga grupo nga nagakontra sa JVA kag mismo mga kunsimidor nga mag-amutay na lang agud makakita sang abogado.
Suno kay Ortiz, bisan P50,000 lang ang ibayad, may yara na sang abogado nga magabaton sang kaso bangud kawsa man ini sang mga pumuluyo.
