Gin-athag sang abogado kag chairperson sa Committee on Human Rights sa Bacolod City Council nga mahimo maglawig sang pila ka tuig antes materminate ang kontrata sa Joint Venture Agreement (JVA) sa tunga sang Bacolod City Water District (BACIWA) kag Prime Water.
Sa interview sang Bombo Radyo Bacolod kay Councilor Atty. Renecito Novero, chairperson sa Committee on Human Rights sa Sangguniang Panlungsod, ang BACIWA lamang ang may ikasarang sa pagterminate sang kontrata.
Apang kinahanglan sang mga ini nga makapakita sang pamatuod nga may violation sa terms of contract sa bahin sang Prime Water.
Samtang malauman naman nga magapagwa man sang ebidensya ang Prime Water nga sila ang nakacomply sa requirements, ukon kung wala gid man natuman ang nakapagkit sa kontrata, magahatag sang nagakaigo nga rasun sa lapses.
Paathag ni Novero, nga sa presentation of evidence pa lamang sang duha ka partido, malawig na nga binulan ukon tuig ang kinahanglan.
Apisar nga makita sang korte nga mabaskog ang ebidensya sang BACIWA, sarang pa nga magafile sang motion for consideration ang Prime Water.
Diri na mahimo maka-intervene ang Local Government in behalf sa mga member-consumers nga naga-antos bangod sa wala nagakaigo nga serbisyo.
Apang sarang gihapon maka-apelar sa Court of Appeals ang Prime Water, tubtob nga ini ang madala na sa Korte Suprema.
Sa tion nga may denial gihapon, ang Prime Water ang sarang pa makafile sang motion for certiorari ukon pagreview sa desisyon sang lower court.
Sa pihak sini, kun samtang nagapadayun ang kaso makita ang pag-imprubar sang serbisyo sang Prime Water, ini ang sarang naman nga mahusay kag mabawi ang ginpasaka nga kaso.
