Yara sa kustodiya sang US Immigration and Customs Enforcement (ICE) ang anay Venezuelan boxing champion nga si Jorge Linares matapos gin-aresto sa El Paso International Airport sa Texas.
Ginkumpirmar sang ICE nga gindakop si Linares bangud sa ginaalegar overstaying sa Estados Unidos.
Ini ang nagsulod sa nasambit nga pungsod sang Oktubre 26, 2023 kag may naka-pending nga deportation proceedings batok sa iya.
Ginpahayag naman sang iya legal team nga siya ang may permiso nga magtinir sa Estados Unidos kag ila naman ginadihon ang mga nagakaigo nga tikang paagi sa pagpakig-angot sa mga otoridad agud gilayon nga maresolba ang isyu.
Nagretiro si Linares sang 2023 matapos ang masobra duha ka dekada nga karera sa professional boxing, kun sa diin ini ang nag-world champion sa featherweight, super featherweight, kag lightweight divisions.





