Positibo ang Alliance of Concerned Teachers’ (ACT) Partylist nga magapabor ang desisyon sang Korte Suprema natuhoy sa petisyon nga ideklarar unconstitutional kag illegal ang P125 million nga Confidential Intelligence Fund (CIF) sang Office of the Vice President (OVP) sang 2022.
Nahibaluan nga nagpahayag si Vice President Sara Duterte nga ang petisyon ang theoritical lamang kag lunsay spekulasyon.
Sa interview sang Bombo Radyo Bacolod kay Congresswoman France Castro, nakapagkit sa konstitusyon nga indi pwede nga maka-usar sang budget nga wala sang authorization gikan sa Kamara kag Senado.
Apang wala sang item tuhoy sa CIF sa 2022 General Appropriations Act (GAA).
Ini ang maathag nga nagapakita nga ang pondo nga ginrelease ang ginkuha sa Contingency Fund sang Office of the President.
Pahanumdom ni Castro nga may magkatuhay nga requirements sa paggamit sang Contingency Fund kag Confidential Intelligence Fund.
Bangod sini, ang ACT upod sa duha pa ka partido ang nagpetisyon sa Korte Suprema nga lantawon ang constitutionality sang pagtransfer sang pondo.
Panindugan sini nga sila ang may ebidensya nga dokumento nga nagapamatuod sang na-obligate nga pondo.
Nagapati ini nga dapat ginbalik sa National Treasury ang budget nga nagamit kuntani sa mas importante nga butang.
Ginatinguhaan naman nila nga makakuha sang report nga ginsumiter sa House Speaker kag Senate President sa kun diin gingamit ang pondo.
Apisar nga 13 gikan sa 15 ka mga hukom sa Korte Suprema ang appointed ni former President Rodrigo Duterte, nagapati si Castro nga magadaog gihapon ang hustisya.
