Nagpasalig ang Agri Partylist nga iduso nila sa pagbukas sang Kongreso ang pagpasaka sang crop insurance sa 100 percent gikan sa karun nga 20 porsyento lamang sa tion sang kalamidad kaangay sang paglupok sang Bulkan Kanlaon.
Sa interview sang Bombo Bacolod kay Agri Partylist Representative Wilbert Lee, nagakasubo ini sa nangin kahimtangan sang mga pumuluyo sa Negros Island kasunod sang paglupok sang Bulkan Kanlaon kag ila gid nga ginapangamuyo ang kaluwasan sang tanan nga pumuluyo.
Pasalig sang Kongresista nga sarang lamang makadangop sa ila talatapan ang sin-o man nga magakinahanglan sang medical assistance bangod sa epekto sang ashfall kag baho sang asupre.
Tinguhaan man nila nga mapalab-ot sa mga apektado ang government assistance.
Sila ang magabulig man sa mga mangunguma nga naapektuhan pinaagi sa sure aid program sang Department of Agriculture.
Ang programa ang nagapahulam sang capital sa mga mangunguma agud sila ang makapanugod nga wala sang interes.
Suno kay Lee, nafile na nila ang hagna nga magapasaka sang crop insurance sa 100 percent kag ini ang ila nalang nga hikuton sa pagbukas sang Kongreso.
Paathag sini nga tuman ka gamay ang 20 porsyento kag tuman pa ka sikot ang mga proseso kun sa diin may mga claimants nga nagakalab-utan sang duha ka tuig antes makuha ang ila nga crop insurance claims.
