Ginhold-up sang tatlo ka mga persona nga nagasakay sa motorsiklo ang ahente sang delivery truck sa Riverside, Barangay Marcelo, Calatrava, Negros Occidental.
Ginkilala ang biktima kay Leila Dimator kag residente sang Purok Awa, Barangay 6, Cadiz City, Negros Occidental.
Sa interview sang Bombo Radyo Bacolod kay Police Lt. Dwight Fajardo, Deputy Chief of Police sang Calatrava Municipal Police Station, ginpahibalo sila ni Police Lt Col. Alvimar Flores, hepe sang Sagay City Police Station nga may yara sang nagluntad nga robbery incident sa Barangay Marcelo sa nasambit nga banwa kun sa diin ginhold-up sang tatlo ka mga individual.
Suno kay Fajardo, ginbalabagan sang tatlo nga nagasakay sa Baja nga motorsiklo ang delivery truck kag ginpangtayaan sang armas-luthang ang mga biktima.
Natigayon sang mga ini nga mataban ang kapin P230,000 nga kwarta.
Suno diri santo sa pahayag sang mga biktima ang gintaya sang mga ini ang 45 caliber kag 38 caliber pistol.
Natigayon naman nga madakpan ang isa sa tatlo ka mga suspek matapos nga magpalagyo kag naintercept sang mga kapulisan sang Murcia Municipal Police Station nga ginpangunahan ni Police Captain Honey Labaro ang Officer-in-Charge.
Ini matapos nga nagcoordinate sila sa mga kaingod nga police stations angot sa nagluntad nga robbery incident kag gindescribe ang ginsakyan sang suspek.
Natumod naman ang duha ka mga at large nga mga suspek nga suno sa nadakpan mga kaupod niya sadto sa trabaho kag mga residente sa South nga bahin sang probinsya.
Nagpatigayon man sang hot pursuit operation ang Calatrava Municipal Police Station sa posible nga pag-aresto sang duha pa ka mga suspetsado.
Suno pa diri, mahimo man nga ang nadakpan nga suspetsado ang responsable man sa robbery incident sa banwa sang Toboso sang tinalikdan.
