Ginakonsiderar subong sang gobyerno nga magpanubo sa mga balayran sa mga airport sa kabug-usan nga pungsod agud makabulig nga masarangan ang balayran sa eroplano sa ginalauman nga pagdagsa sang mga pasahero sa tion sang Holy Week.
Suno sa Department of Transportation, kabahin ini sa mga tikang nga ginamando ni presidente Ferdinand “Bongbong” Marcos Jr. agud mabuhinan ang malala nga epekto sang nagasaka nga presyo sang gatong.
Suno kay DOTr Acting Secretary Giovanni Lopez, igapresentar sa board ang ano man nga mahimo nga proposal agud maaprubahan kag posible makapagwa sila sang desisyon para sa posible nga adjustment sa pamasahe sa madason nga semana.
Nauna na nga gin-anunsyar sang presidente ang pila ka mga tikang sang gobyerno agud mahagan-hagan ang grabe nga epekto sang pagsaka sang mga produktong petrolyo tuga sang nagakatabo nga krisis subong sa Middle East.
