Ginsabat ni Philippine Army Spokesperson Col Louie Dema-ala ang mga alegasyon nga pila sa mga napatay sa engkwentro sa Brgy Salamanca, Toboso ang researchers, journalists, student leaders, kag social workers lamang.
Nahibaluan nga may mga grupo nga nagapanindugan nga nagbayolar ang militar sa tawhanon nga kinamatarong kag International Humanitarian Law, gani sila ang dapat batikuson sangsa kilalahon.
Aminado si Dema-ala nga masubo nga madamo sang nadulaan sang kabuhi, kag importante man nga mapatigayunan sang nagakaigo nga imbestigasyon.
Apang pahanumdom sini nga isa sa dako nga kwestyon kun ngaa yara sa mismo nga encounter site ang gina-alegar mga researchers, journalists, student leaders, kag social workers, kag sila ang armado kag nagabato sa tiruhay batok sa mga suldado.
Panindugan sini nga ang paghupot nila sang armas kag aktibo nga pagpartisipar sa armado nga pagpakigbato ang nagakontra sa naratibo nga nagalapta sa social media.
