BACOLOD CITY– Ginpanubuan na sang Philippine Institute of Volcanology and Seismology (PHIVOLCS) ang alert status sang Mount Kanlaon gikan sa Level 2 (moderate level of unrest) padulong sa Alert Level 1 (low level of unrest).
Kasunod sang abnormalidad nga tuga sang nagtaas nga volcanic earthquakes sang Noviembre 15 tubtob Disyembre 26, 2017, nagapakita na karun ang Kanlaon sang protracted decline ukon nagadugay nga pagnubo sa iya mga aktibidad.
Ini ang ginasuportahan sang observation parameters kaangay na lamang sang pagnubo sang iya seismicity activity sang 2018.
Sang 2018 may yara sang average nga 4 ka earthquakes kada adlaw nga narekord kag sa karun nagapabilin ini sa baseline levels nga 0-2 volcanic earthquakes kada adlaw.
Santo man sa nagapadayon nga GPS measurements, mahinay man ang inflation ukon ang paghabok sang bulkan nga posible tuga sang pressurization gikan sa manabaw nga hydrothermal system.
Bangud sang nasambit nga mga obserbasyon ginpanubuan na sang PHIVOLCS ang alert status sang Bulkan Kanlaon.
Buot-silingon sini, yara na sa manubo nga lebel ang mga observational parameters kag wala na sang ginalantaw nga magmatic eruption sa masunod nga mga inadlaw.
Apang kun magsaka naman ang nauna na nga mga parameters, posible nga ibalik naman sa Level 2 ang status sini.
Apang ginadumilian sa gihapon ang publiko nga magsulod sa 4-kilometer radius Permanent Danger Zone (PDZ) bangud sang peligro sang rockfalls, pagbuga sang aso kag abo sang baba sang bulkan.
Tuig 2017 sang ginpasaka sa Level 2 ang alert status sang Kanlon bangud sang nagtaas nga mga volcanic earthquakes.
