Dako ang kalipay ni Silay City Mayor Joedith Gallego nga narecover na ginkawat nga ‘Mango Harvesters’ painting sang sikat nga pintor nga si Fernando Amorsolo gikan sa Hofileña Museum sa Barangay 1, Silay City.
Ang painting ang ginkawat sang Hulyo 3, kag ini ang nahimo nga marecover sang National Bureau of Investigation – Special Task Force (NBI-STF) sang Hulyo 11 sa Tomas Morato, Quezon City.
Sa interview sang Bombo Radyo Bacolod kay Gallego, sang mahibaluan nga narecover na ang painting, gilayon man ini nagmando sa hepe sang Silay City Police Station nga magpa-Manila kag magkoordinar sa NBI Manila.
Ang ‘Mango Harvesters’ ang may ginabanta orihinal nga value nga 8 million tubtob 12 million ang ginbaligya online sa balor P3.5 million.
Suno kay Gallego isa ka concerned individual ang nakakita nga ginabaligya ang painting kag bangod nagnationwide na ang balita sa pagkadula sini, gilayon man ini nga ginreport sang informant sa otoridad.
Pinaagi sini, napatigayon ang entrapment operation sa duha ka suspect nga sanday Ritz Chona Ching kag Donecio Somaylo, nga nanindugan nga sila ang ginsugo lamang ni certain ‘Atty Ching’.
Padayun pa sa karun nga ginatumod ang identity sang nakuha sa CCTV nga nagkawat sang painting, nga lain sangsa mga nadakpan nga nagbaligya.
Suno kay Gallego, sila ang nagakoordinar upod sa NBI-Negros Occidental sa pamilya Hofileña kag nakadepende na sa mga ini kun magsugot nga ihatag sa National Museum ang kustodiya sa painting.
Nagpasalig man ini nga hikutiran man nila ang paghatag sang gintanyag nga P25,000 nga reward sa nagtudlo agud madakpan ang mga suspect.
Ang mga suspect ang mangatubang sang kaso nga paglapas sa Presidential Decree 1612 ukon Anti-Fencing Law.
Ginpasalamatan man ni Negros Occidental Governor Eugenio Jose ‘Bong’ Lacson ang tanan nga naghatag sang effort agud marecover ang painting.
Ginalantaw sini ang posibilidad nga may dako nga sindikato sa likod sang pagpangawat bangod lain ang nagkuha sa museum kag lain man ang nagbaligya samtang kaangay nga gindalian man nga madispose ang painting gani ginbaligya sa manubo nga presyo.
Nagapati man ini nga gilayon madakpan ang suspect, apang kwestyon pa para sa gobernador kun paano nakalusot kag nakalab-ot sa Manila ang ‘Mango Harvesters’ painting.
