Isa sa solusyon nga ginalantaw sang alkalde sang Bacolod agud ma-engganyo ang mga traditional drivers nga magbalhin sa modernized jeepney amu ang 5-years warranty nagikan sa mga suppliers agud may garantiya sila nga magadugay ang salakyan nga ila pagabayaran kada bulan.
Suno kay Mayor Alfredo Benitez, sang nakighinun-anon ini sa mga jeepney drivers, ila ginpahayag nga nakulbaan sila magbalhin sa modernize jeepney bangud committed ang mga ini nga magbayad sang monthly amortization apang wala sang kasiguraduhan kun magdugay ang salakyan.
Suno kay Benitez, naka-istorya ini sa mga suppliers kag sila ang magahatag sang 5-years warranty agud mahatagan sang garantiya ang mga drivers.
Isa man sa ila ginakahangaw-an sang mga PUJ drivers amu nga tuman kadako sang ila magasto sa modernized jeep kag kun pwede makina lang ang ila baklon kag usaron lang ang daan nga kaha.
Apang suno sa alkalde, iya ginpaintindi sa mga ini nga sa karun ang mga pasahero ang nagapangita na sang mas maayo nga version sang jeep, may WiFi, aircon, kag malimpyo gani disbentaha kun makina lang ang pagabaklon nila.
Suno sa iya, tubtob lamang sa bulan sang Setyembre ang apelasyon sini sa Land Transportation Franchising and Regulatory Board (LTFRB) nga indi pagdakpon ang mga PUJ drivers nga wala nakaparehistro sang prangkisa.
