Ginpanawagan ni Bacolod City Mayor Greg Gasataya nga imbes magbuya sang mga pagbatikos, buligan na lamang ang ciudad nga maka-engganyo sang dugang nga mga bisita sa palaabuton nga Masskara Festival 2026.
Sa interview sang Bombo Radyo Bacolod sa alkalde, isa sa ginakwestyon sang pila ka mga social media personalities ang nahanungod sa pagsaylo sang Arena Dance Competition sa Reclamation Area sa Rizal Street, sa tunga sang SM City Bacolod.
Kalakip sa ginareklamo ang gina-alegar mahimo baha-on ang mga dancer.
Panindugan ni Mayor Greg nga ginpatsekyar nila ang Paglaom Sports Complex kag nakita sang engineer nga delikado na ang pasilidad kag mahimo magcollapse ang bench area.
Suno sa alkalde, indi pag-irisgo sang ciudad ang safety sang mga tumalan-aw.
Nagapati ini nga ang mga nagabatikos sa desisyon sang ciudad amo ang mga luyag lamang makahakot sang views ukon para sa monetization.
Nagalaom ini nga kuntani gamiton na lamang ang platform sa pagbulig nga mapalapnag pa ang Masskara Festival 2026, para makahakot sang dugang nga bisita.
Nagapati ini nga indi maghatag sang suhestyon, ang Bacolod Gugma Foundation nga amo ang festival organizer, nga wala nila natun-an sang maayo./
