Liwat nga nagpatawag si Bacolod City Mayor Alfredo Albee Benitez sang emergency meeting kahapon, Marso 7, angot sa ginapangatubang nga water crisis sang ciudad sang Bacolod.
Suno kay Benitez, nagpatawag sila liwat sang emergency meeting agud nga makapangita sang dugang nga water source.
Suno kay Benitez, may yara na sila sang natumod nga duha ka mga locations nga ginalakipan sang Matab-ang kag Bocal-Bocal Spring sa Barangay Alangilan.
Ang Bocal Bocal Spring ang sarang maka-deliver sang 5 to 8 million liters per day.
Samtang, ang ciudad naman sang Bacolod ang maga-initiate sang dugang nga 20 million liters per day halin sa Matab-ang River.
Suno diri, ginatapos nalang ang technical studies agud masuguran na ang construction.
Suno sa alkalde may shortage na sang tubig bangud sa El Niño, nadugangan pa ini bangud nagnubo sang 12 percent ang water supply sang Baciwa-PrimeWater.
Suno kay Benitez, kinahanglan gid nga magovertime sa pagpangita sang water source bangud kulang na gani ang supply sang tubig, gindugangan pa sang tama kainit nga panahon.
Kapin sa 2 kilometers man ang kinahanglan e-set up nga tubo ukon pipe laying halin sa water source padulong sa filtration facility kag reservior sang Baciwa sa Barangay Mandalagan.
Ginpahayag man ni Benitez nga tawgan niya ang National Water Resources Board (MWRB) para sa application sang water rights sa Matab-ang River apang suno diri, mahimo nga magarisgo nalang ini kag kuhaon niya nalang ang tubig agud nga madasig nga masolusyunan ang ginapangatubang sang Bacolod City nga water crisis.
