BACOLOD CITY-Naghingyo ang alkalde sang La Castellana sa mga pumuluyo nga indi magkahangawa apisar nga may yara sang isa ka person under investigation (PUI) sa 2019 novel coronavirus acute respiratory disease (2019 NCOV-ARD) nagikan sa banwa.
Madumduman nga isa ka persona sa nasambit nga banwa ang nagdugang sa duha ka mga PUIs sa probinsya, Huwebes sang gab-i.
Gindala na ini sa isa ka pribado nga ospital sa ciudad sang Bacolod agud makuhaan sang specimen nga ipadala sa Research Institute for Tropical Medicine (RITM) agud mahibaluan kun positibo ini sa virus.
Sa interview sang Bombo Radyo kay Mayor Rhumayla Nicor Mangilimutan, nagpasalig ini nga nagahimo ang mga opisyales sang banwa sang mga tikang agud mahatagan sang igtalupangod ang suspected nga pasyente.
Suno sa iya, ginkanselar ang klase sang mga kabataan halin pre-school tubtob senior high school bangud sa kakulba sang mga ginikanan.
Suno pa sa alkalde, nagapadayon ang ila pagmonitor sa kondisyon sang persona kag ginahulat nalang ang resulta sang swab test kag CBC nga halin sa Department of Health kag RITM agud mahibaluan kun positibo ini sa virus.
Gindugang man ni Mangilimutan nga handa ang local government unit (LGU) nga magsuporta sa mga balayran sa ospital sang nasambit nga pasyente.
Nagalaom man ang alkalde nga mangin negatibo ang resulta sang mga ginpatigayon nga tests.
