Nagalaom ang Alliance of Concerned Teachers-Negros Occidental nga mahatagan sang pagtamod sang presidente sa patigayunon nga State of the Nation Address (SONA) ang pagpasaka sang sweldo sang mga manunudlo.
Sa interview sang Bombo Radyo Bacolod kay Grace Abellar, secretary general sang Alliance of Concerned Teachers-Negros Occidental, ang sweldo sa karun sa bag-o pa lang nakasulod sa Department of Education ang yara lamang sa Salary Grade 11 kag wala gid napasakaan kag ang masubo pa, masami lamang sila ang napasalig.
Suno kay Abellar, bangud kulang ang mga galamiton sang mga manunudlo, ang mga ini ang nagagasto sang personal nila nga kwarta agud lamang nga may gamiton.
Suno diri, kinahanglanon nagid nga mapasakaan ang sweldo sang mga manunudlo bangud nagasaka naman ang tanan nga mga balaklon.
Suno kay Abellar sa duha ka tuig nga pagpungko sang presidente wala gid sini natuman ang pangako sini sadtong kampanya nga mahatagan sang igtulupangod ang mga concerns sang mga manunudlo kag pasakaan ang sweldo.
Apang sa pihak sini, ginpasalamatan man sini si President Ferdinand Marcos Jr., bangud gin-aprubahan na sini ang cash allowance nga P10,000 para sa mga manunudlo epektibo sa masunod nga tuig.
