Ginbawian sang kabuhi ang 53-anyos nga amay sa Barangay Banago, Bacolod City matapos gin-atake sa tagipusuon samtang nagalantaw sang away ni Senador Manny Pacquiao kag American boxer Keith Thurman, Domingo sang udto.
Ang biktima ginkilala kay Edgardo Macairan sang San Mateo Village, Purok Langis, Barangay Banago.
Naglantaw sang boksing ang maghimata sa sulod sang ila compound.
Sa interview sang Bombo Radyo Bacolod sa apo ni Macairan nga si Ron Rey Lora, naghinugyaw sila sang napatumba ni Pacquiao si Thurman sa round one.
Pag-abot sa round two, natalupangdan sang maghimata nga nagahuragok si Macairan samtang nagapungko sa bangko.
Pila ka minutos ang nakaligad, natalupangdan sang mga ini nga naglain na ang kolor sang nawong ni Macairan gani ginhingagaw ini dala sa Riverside Medical Center apang wala nasalbar.
Suno kay Lora, nagsufrer sang cardiac arrest ang iya lolo nga nagresulta sa iya kamatayon.
Suno sa apo, wala man sang abiso ang doktor ni Macairan nga indi ini dapat masobrahan sang kalipay kag kasubo.
Apang aminado si Lora nga nag-sufrer sang mild stroke ang iya lolo duha na ka tuig ang nakaligad.
