Plano nga ipakonsulta sa psychiatrist ang amay nga suspect sa pagpatay sa iya kaugalingon nga bata sa Brgy. Rizal, Sagay City, Negros Occidental.
Madumduman nga napatay ang 17-anyos nga babayi matapos ginlapusan sang shock sang motorsiklo sang iya kaugaligon nga amay sang Marso 9.
Ginkilala ang biktima nga si Precious Herry Balicuatro, samtang ang suspek amo si Joedin Braza, 41 anyos, kasado, Tricycle Driver kag lunsay residente sang nasambit nga lugar.
Sa interview sang Bombo Rado kay Police Lt Col Alvimar Flores, hepe sang Sagay City Police Station, napasakaan na sang kaso ang suspek kag plano sang City Health Office nga ipalantaw ini sa psychiatrist agud matumod kun yara pa ini sa insakto nga paminsaron.
Suno kay Flores, negatibo naman ang resulta matapos maipadalom si Braza sa drug test.
Sa karun, ang suspect ang nakahunong sa Bureau of Jail Management and Penology.
