BACOLOD CITY — Tuman ka brutal ang nangin kamatayon sang isa ka amay matapos ginhatok-hatok sang labo sang iya man lang nga bayaw kag hinablos sang iya asawa sa ciudad sang Sipalay.
Sa interview sang Bombo Radyo Bacolod kay Punong Barangay Marlon “Bebing” Canillo sang Brgy. San Jose, naabtan pa nila nga ginalabo sang mga suspetsado ang biktima nga si Lito Bawaan, 58-anyos, may asawa kag siyam ka kabataan sang Purok Strangers Paradise, Brgy. San Jose mga alas-5:45 kaina sang hapon.
Ginkilala naman ang mga suspetsado nga sanday Bonifacio Tabanao Jr., 47, single kag residente sang Purok Tinablan, Brgy. Gil Montilla kag hinablos sini nga si JR Bacurnay, 24, sang Brgy. Cabadiangan.
Si Tabanao ang manghod sang asawa sang biktima kag hinablos naman sini si Bacurnay.
Suno kay Punong Barangay Canillo, hubog sang ginsulong sang mga suspetsado ang biktima sa ila balay kag ginpatay.
Santo sa nakita ni Canillo sa crime scene, naglinapta ang utok sang biktima sa ila nga kusina kag halos mabuka ang bagol, kag ginpanghatok-hatok man ang iya tuhod kag tikod.
Gin-utod pa ni Bacurnay ang nawala nga butkon sang biktima kag ginhaboy sa guwa sang kusina.
Magluwas sa paglabo, ginbuno kag ginlampusan man sang suspetsado ang biktima.
Yara man ang asawa kag kabataan sang biktima sang nag-abot ang mga suspetsado apang nagpalagyo ang mga ini agud magpangayo sang bulig.
Dumot ang ginalantaw nga motibo sa krimen bangud nahibaluan nga sang 2012 ginluthang man ni Bawaan ang utod sang iya asawa kag ni Bonifacio nga si Roberto kag ini ang napatay gid.
Napriso si Bawaan kag sang 2018 lang nakaguwa.
Gilayon naman nga nagresponder ang Sipalay City Police Station kag naaresto ang mga suspetsado.
