Nagtukod sang “Negros Academia de Futbol”, isa ka football academy ang Spanish National nga si Bienvenido Maranon, anay Ceres Negros player kag sa karun kabahin sa Philippine team nga AZKALS.
Sa interview sang Bombo Radyo Bacolod kay Maranon, ginpahayag sini nga samtang nagahampang pa ini sa Ceres Negros, plano na nila ang pagtukod sang Football Academy.
Ginpili niya nga magtukod sang personal nga Football Club sa Bacolod bangod nanamian ini sa atmosphere sa syudad kag sa nabatun nga suporta kag pagpalangga sang ini ang nagahampang pa sa Panaad Park and Stadium.
Nakita man ni Maranon ang kadamo sang mga luyag mag football sa probinsya, gani luyag sini nga ipasaka pa ang sports sa mas mataas nga lebel.
Suno diri, luyag niya nga mahimo nga prefessional ang mga players tubtob sa makabatun na sang mataas nga salary.
Aminado ang Spanish player nga madamo sang mga maayo nga players sa Pilipinas kag nakita man sini ang “desire to learn”.
Panugyan sini nga bisitahan ang ila nga training center sa Bacolod Central District kun sa diin makita man ang facilities kag tools nga ila gina-offer kag nakadepende na sa pumuluyo kun magadesisyon sa pagparegister.
Sa karun apat ka tuig tubtob 16 anyos lamang ang ila nga ginabatun apang sa palaabuton, plano nila nga magbukas man para sa mga adults.
Ang registration ang nag-umpisa sang Biyernes kag magalawig tubtob sa Enero 10, 2023.
Paathag ni Maranon nga tanan nga luyag makahibalo kag may passion sa football ang sarang maka-enroll lalaki man ukon babayi.
Sarang makapadulong sa ila training center Lunes tubtob Sabado alas 11:00 sang aga tubtob alas-3:00 sang hapon, kag magluwas sa physical registration, sila ang nagabatun man sang online registrants.
Ginakalipay sang player nga sa duha ka adlaw, madamo na sang nakaparehistro kag nagdangat na sa 25 kasubong man nga madamo sang mga babayi nga nagpakigbahin.
Paathag ni Maranon, nga ang sistema nila ang mangin kaangay man sa eskwelahan kag ginapasalig sini nga pagahimuon nila nga professional humalin sa staff tubtob sa players.
Sa Enero 10, maga-umpisa na ang training Lunes tubtob Miyerkules kag may hampang sa kada Sabado.
Pasalig sini nga tanan ang mahatagan sang tyansa sa paghampang, apang aminado ini nga sila ang magahuman sang levels nga A, B kag C kun sa diin ang Level A amo ang kabigon nga pinakamaayo nga players kag pagahanason pa agud malab-ot ang professional level tubtob sa makabatun na sang dako nga salary sa sports.
Samtang ang Negros Academia de Futbol ang pagabug-usan sang 10 ka mga coaches nga pagalakipan sang utod sini nga si David Maranon kag isa pa ka Spanish player gikan sa Madrid Football Academy kaupod sa walo ka mga lisensyado nga Filipino Football coaches.
Si Maranon, nga natawo sa El Puerto de Sta. Maria, Spain gikan sa pigado nga pamilya kun sa diin ang amay lang sini nga construction worker ang naga-income.
Gikan sa wala, bangod sa pagpaninguha, sa karun maayo na ang ila pagpangabuhi bangod sa dako nga salary gikan sa Football.
Kaangay sa kaugalingon nga eksperyensya, luyag man ni Maranon nga itudlo sa mga maga-enroll sa Negros Academia de Futbol nga kun siya ang nakabangon gikan sa kapigaduhon bangod sa nasambit nga sports, wala sang rasun nga indi man nila ini mahimo.
