Patay ang anay priso matapos ginluthang sa Prk Sigay, Brgy Singcang-Airport, Bacolod City pasado alas-9:00 kagab-i.
Ang biktima ang ginkilala nga si Roberto Santocildes alyas Berto, 56 anyos, kasado, tumandok sang Brgy Talacagay, Hinobaan.
Sa interview sang Bombo Radyo Bacolod kay Rogina Bedia, live-in partner sang biktima, nagapungko sila sa duyan sang biktima kapin 10 tubtob 15 ka metros gikan sa ila balay.
Suno diri, nagahampang sang scatter ang iya live-in partner sa cellphone sang hinali nga nagpalapit ang suspect kag ini ang gintiro gamit ang ginapatihan sulpak.
Pahayag ni Bedia nga madulom ang ila pwesto gani wala nila natalupangdan ang pagpalapit sang suspect, kag wala man sini mahimutaran.
Suno diri, nagtindog pa kag naglakat palayo sa duyan si Santocildes, samtang siya ang unay naman nga ginatayaan sang sulpak, tubtob nga ini ang natumba.
Suno kay Bedia, wala na ini nakabati pa sang ikaduha nga lupok.
Pahayag sini nga ang biktima ang nakagwa sa prisuhan sang Agosto bangod sa kaso nga attempted murder.
Ini matapos nga ginbuno sini ang iya kaupod sa pagpaminta sa Deca Homes, Bag-ong Dalan, Brgy Cabug, Bacolod City.
Luwas diri, 20 ka tuig man nga napriso sa Muntinlupa si Santocildes bangod sa patong-patong nga kaso.
Suno kay Bedia, nacontact na sang kapulisan ang pamilya sang biktima sa Candoni.
Wala naman ini sang mahimo kun kuhaon sang iya orihinal nga asawa ukon sang pamilya sini ang bangkay, kag siya ang maga-ugyon na lamang sa ila nga plano.
