Patay ang anay miyembro sang Philippine National Police matapos ginpulihan tiro sang tatlo ka mga suspetsado sa Purok Dos, Barangay Linaon, Cauayan, Negros Occidental, alas-6:40 kaina sang aga.
Suno kay Police Major Anthony Grande, hepe sang Cauayan Municipal Police Station, ginkilala ang biktima kay Vincent Decena alyas Notnot, 54 anyos kag residente sang nasambit nga banwa.
Nagainom sang kape sa Adelfa Coffee Shop si Decena sang nagpalapit ang tatlo ka mga lalaki nga nagpanaog sa pribado nga salakyan kag siya ang gintiro sa nagkalain-lain nga bahin sang lawas.
Suno sa mga nakasaksi, bulos-bulos ang tatlo ka mga suspetsado sa pagtiro sa anay pulis.
Ang mga suspect ang nagasuksok sang face mask kag bonnet kag indi kilala sang mga tawo nga natabuan nga ara sa lugar.
Narecover sa crime scene ang walo ka empty shells sang caliber .45 pistol.
Sa karon, ginahibalo pa ang motibo sa krimen.
Si Decena ang nagbiya sa serbisyo sang tuig 2018 paagi sa absence without official leave.
Siya ang may pending nga kaso nga violation sang Section 12 sang RA 9165 ukon Comprehensive Dangerous Drugs Act of 2002 kag ginakabig nga high value individual sa illegal nga druga.
