BACOLOD CITY — Magluwas sa iligal nga druga, dapat tutukan man sang Philippine National Police ang illegal gambling.
Ini ang ginpahayag ni Department of Interior and Local Government (DILG) Undersecretary Atty. JV Hinlo nga personal nga naistorya sang Bombo Radyo sang magpauli ini sa Bacolod.
Suno kay Hinlo, indi malipod nga hugot nga ginatutukan sang kapulisan ang kampanya sa iligal nga druga bangud personal nga luyag ni Presidente Rodrigo Duterte nga mapapas ini nga bisyo nga sa ulihi mahimo magdangat sa pagkomiter sang kriminalidad.
Apang suno sa tiglikom, indi dapat mapabay-an sang PNP ang illegal gambling bangud nalakip man ini sa ila mga responsibilidad.
Pagpanghangkat ni Atty. Hinlo, dapat madakpan sang kapulisan ang mga nagapataya sa ila nga lugar.
May kaangtanan sini, gin-aku ni Bacolod City Police Office Director Police Senior Supt. Jack Wanky nga may isa ka anay pulis nga ila gina-monitor bangud sa kaangtanan sini sa operasyon sang illegal gambling sa ciudad sang Bacolod.
Suno kay Wanky, indi lang sini mahingadlan subong ang anay pulis bangud target pa nila ini sa karon sa ila nga operasyon apang ginpasiguro nga ila ini igabuyagyag kun mapasakaan na nila ini sang kaso.
Aminado ang BCPO director nga wala direkta nga nagapataya ang anay pulis apang nagatindog naman ini nga financier agud maka-operate ang ilegal nga pataya.
Nagalaum naman si Senior Supt. Wanky nga may madakpan sila nga koridor sang amo nga bangka agud personal nga matudlo ang ila ginabantayan nga anay pulis.
Gin-aku man sini nga naghugpong na ang mga bangka ukon operators sang illegal gambling sa ciudad sang Bacolod.
