Inspirasyon sang isa ka anay nagatrabaho sa kampo ang ila sitwasyon sa kabuhi sa pagtinguha tubtob sa mangin isa na ka licensed Agricultural Engineer.
Si Leonilo Candelario Jr., 24 anyos, single kag residente sa Barangay Kamingawan, Kabankalan City Negros Occidental ang nangin opisyal nga Agricultural Engineer matapos maggwa ang result sang Licensure Examination nga ginkuha sini sang Setyembre 15.
Siya ang naggradwar sa Central Philippine State University (CPSU) – Kabankalan bilang Magna Cum Laude.
Sa interview sang Bombo Radyo Bacolod kay Candelario, ginpakigbahin sini nga pito ka tuig pa lamang sang siya ang mag-umpisa sa pagpangani, onse anyos sang siya ang nagtrabaho sa ulingan samtang 12 anyos sang mag-umpisa sa pagkarga-tapas sang tubo.
Pahayag sini nga 12 sila tanan nga mag-ulutod kag siya ang kamagulangan gani nagtinguha gid ini nga makatapos sa pag-eskwela.
Aminado naman ini nga sang Grade 1 tubtob Grade 4 madamo ini sang line of 7 nga grado bangod tuman ka layo ang eskwelahan kag nagakabuyo ini sa barkada.
Apang sang Grade 5 kag nangin mas malapit ang ginsayluhan sini nga eskwelahan didto na ini kag nakarealisar nga luyag sini makatapos sa pag-eskwela agud nga makahalin sila gikan sa malala nga kapigaduhon.
Ginapakamaayo naman sini bangod nahangpan sang mga manunudlo ang ila nga sitwasyon ilabi na nga nagakakita man ini nga yara sa kampo, kun sa diin sa masami siya ang ginahatagan kahigayunan nga makakuha sang quizes kun siya ang may trabaho kag indi maka-eskwela.
Aminado man ini nga nangin mabudlay ang iya nga pag-eskwela ilabi na nga wala sila sang kuryente.
Dugang pa sini nga nagadala ini sang notebook bisan sa pagtrabaho agud nga makareview sa tion sang pagpahuway.
Si Candelario ang naggradwar sa Highschool nga 2nd Honorable Mention gani siya ang nakakuha sang Commission on Higher Education (CHED) scholarship kag nakakuha sang kurso nga Bachelor of Science in Agricultural Engineering sa CPSU Kabankalan.
Apisar nga yara na sa kolehiyo, padayun gihapon ini sa pagtrabaho sa kampo agud nga may magamit sa pag-eskwela.
Dugang pa sini nga ginhingyo lamang sini sa konsehal sa ila nga syudad ang gingamit sini nga scientific calculator sa pag-eskwela sa kolehiyo.
Apisar sa pagtrabaho sa kampo samtang naga-eskwela nakuha gihapon ni Candelario nga mag gradwar nga Magna Cum Laude sang 2020.
Wala ini nakakuha sang Board Exam sang 2021 bangod wala ini sang ikasarang sa pagbyahe sa Cebu kag natigayon lamang nga makakuha sini nga Setyembre.
Si Candelario ang self review lamang bangod wala man ini sang ikasarang sa pagsulod sa Review Center.
Sa karun siya ang Project Based Engineer sa Candoni CPSU extension campus kag may-ara naman sang ginabatun nga sweldo.
Dako man ang pagpasalamat sini sa nagbulig sa iya nga pag-eskwela kag ginapahanumdom sa iban nga ang kapigaduhon ang indi upang sa paglab-ot sang handom.
