Nagdangat sa anum ka balay ang totally damaged samtang ang isa ka furniture warehouse naman ang partially damaged sa nagluntad nga sunog sa Purok Sto. Nino, Lopez Jaena Street, Barangay 31, ciudad sang Bacolod, kahapon sang hapon, Disyembre 30.
Sa interview sang Bombo Radyo kay Fire Inspector Jemarie Tapiru, Deputy Fire Marshal sang Bacolod City Fire Station, pasado alas-5:00 kahapon sang hapon, nakabaton sila sang tawag halin sa isa ka pumuluyo kag gilayon nga nagresponde.
Suno kay Tapiru, nag-umpisa ang sunog sa likod nga bahin sang balay ni Eda Palomo.
Sa karun, may-ara sang tatlo ka anggulo nga ginalantaw ang BFP sa ginhalinan sang kalayo nga ginalakipan sang electrical ignition, unattended cooking, kag welding.
Nagdangat sa 28 ka minutos ang firefighting antes gindeklarar ang fire-out.
Naglab-ot sa P75,000 ang balor sa halit nga ginbilin sang sunog.
Sa karon, padayon ang imbestigasyon sang Bacolod City Fire Station agud mahibaluan ang ginhalinan sang kalayo nga nagtuga sang sunog.
