BACOLOD CITY – Anom tanan ka mga persona ang nagkaladakpan sa anti-drug operations sang nagkalain-lain nga police stations sa ciudad sang Bacolod sa sulod lamang sang isa ka adlaw.
Ini ang kadungan sang pagbalik sa Philippine National Police (PNP) sang anti-illegal drug operations makaligad ang masobra isa ka bulan nga suspensyon sini.
Ang mga nagkaladakpan ginalakipan sang duha ka mga drug pusher sa nasakupan sang Police Station 7 nga mag-live-in partner.
Sila amo sanday Rodney Lanada sang Purok Kabugwason, Barangay Mansilingan kag Janet Candelario, 35-anyos, sang Barangay Singcang.
Na-recover sa mga ini ang P45,000 nga balor sang shabu, mga drug paraphernalia, kag cash nga P1,640 nga ginapatihan kita sa pagbaligya sang druga.
Samtang, isa man ang nadakpan sang Police Station 2 nga ginkilala kay Richard Tutop sang Seresa North, Barangay 3; isa man sa Police Station 8 nga ginkilala kay Crystalyn Limbaga, 32-anyos sang Purok Neptune, Barangay Singcang; isa ang sa Police Station 4 nga si Caroline Benal, 35-anyos sang Purok Kreza, Barangay 27; kag isa sa Police Station 10 nga ginkilala kay Mary Rose Sanchez sang Purok San Roque, Barangay Handumanan.
Ginahanda na ang nagakaigo nga kaso batok sa mga nagkaladakpan.
