BACOLOD CITY — Diutay nalang kuntani ang mga ahensya sang gobyerno sa Negros Island Region nga wala sang regional director apang ginbungkag pa ang NIR.
Sa Good Morning Philippines Program sang Bombo Radyo Bacolod, ginpahayag ni Dr. Ma. Lina Sanogal, miyembro sang technical working group sang NIR, nga masubo nga matunaw ang rehiyon nga natukod sang tuig 2015, matapos ang masobra 20 ka tuig humalin sang ini ang ginpanamkon sang mga opisyal kaangay ni former Governor Daniel ‘Bitay’ Lacson.
Nangin madasig suno sa iya ang pagsabat sang mga ahensya sang gobyerno sa Executive Order 183 ni anay Presidente Noynoy Aquino sa diin gilayon nga gintukod ang mga regional offices sa NIR.
Ang Department of Public Works and Highways suno kay Sanogal ang nagpatindog gid sang opisina sa Negros Oriental.
Nag-hire naman ang Philippine National Police sang bag-o nga mga miyembro para sa PRO 18 samtang sakop naman sang isa lang ka command sang Philippine Army ang Negros Occidental kag Negros Oriental.
Suno kay Sanogal nga amo man ang pinuno sang Provincial Planning and Development Office, madasig lang ang pagdesisyon ni DBM Secretary Benjamin Diokno nga bungkagon ang NIR bangud sa kakulang sang pondo bisan pa nga wala sini nakita kun ano ang nadangatan sang mga regional offices.
Nahibaluan nga wala gani nakakadto sa NIR si Diokno agud lantawon ang matuod nga sitwasyon antes gin-dissolve ang rehiyon.
