Apat ang patay matapos nga gin-massacre ang pamilya sang isa ka mangunguma sa Sitio Kangkiling, Brgy. Buenavista, Himamaylan City, Negros Occidental kagab-i.
Natabo ang krimen antes mag-alas-10:00 kagab-i sa balay sang Pamilya Fausto nga human sa kawayan kag nahamtang sa banglid.
Sa interview sang Bombo Radyo kay Barangay Kagawad Arlene Entirro, nabatian nila ang inarak sang mabaskog nga lupok apang indi matumod kun sa diin ini dampi.
Gindumdom naman sang iban nga pumuluyo nga may engkwentro sa tunga sang Philippine Army kag New People’s Army.
Kaina sang aga, nabalitaan sang mga barangay officials ang natabo sa Pamilya Fausto bangud natukiban sang subang sang mag-asawa ang natabo sa iya ginikanan kag duha ka mga utod nga lalaki bangud wala ini kagab-i sa ila nga balay bangud may bana na ini.
Pag-abot sang mga otoridad sa crime scene, ang iloy nga si Imelda Fausto, 49-anyos, ang yara sa idalom sang hagdan, wala na sang kabuhi, may igo sang bala sa ulo kag iban nga bahin sang lawas.
Yara sa unhan sang kamot ni Imelda ang thermos nga ginapatihan ginakaptan sini sang nag-abot ang mga suspetsado nga nagpaarak sa ila sang luthang.
Ang bata naman sini nga si Raben, 11 anyos, Grade 5 pupil, ang nasapwan nga nagakabit sa atangan sang puertahan sa likod nga bahin sang balay kag may igo man ini sa ulo.
Ginapatihan nga nagtuyo pa kuntani si Raben nga malagyo padulong sa kamaisan sa likod sang ila balay apang naabutan sang mga suspetsado.
Ang iya magulang naman nga si Ben, 15-anyos, Grade 8 pupil, ang wala gid nakahalin sa iya hiligdaan kag diri na ini napatay tuga sang madamo nga igo sang bala.
Matapos ang pagpangita sang mga otoridad, nasapwan nila ang bangkay sang amay nga si Rolly Fausto sa kamaisan kag puno na ini sang lutak.
Sa initial investigation sang mga otoridad, M16 rifle ang gingamit sa pagtiro sa mga biktima kag malapit lang ang distansya.
Suno kay Entirro, pila ka hugnat ang linupok kag ginapatihan sini nga ang iloy ang una nga ginpatay.
Sang nag-untat sang makadali ang linupok suno sa iya, mahimo nga ginlagas ang bana bangud nagdalagan ini sa kamaisan kag didto naman liwat naglinupok.
Suno diri, isa ini ka masubo nga balita para sa ila nga barangay bangud ini ang una nga kahigayunan nga apat gid ang ginpatay.
