Ginbawi sang apat sa 18 ka mga nagpakilala nga anay bodyguards ni former Congressman Zaldy Co ang ila nauna nga akusasyon.
Sa panibag-o nga affidavit, ginpahayag nila nga wala sang kamatuoran ang mga una nga panaysayon ukon alegasyon batok nanday President Ferdinand Marcos Jr., anay House Speaker kag Leyte 1st District Representative Martin Romualdez, Zaldy Co, kag iban pa nga personalidad sa ginaalegar pagdeliver sang male-maleta nga kwarta.
Suno sa ila, nagpirma sila sadto sa joint affidavit kabaylo sang bulig pinansyal kag seguridad para sa ila mga pamilya.
Apang sa karon, luyag na nila mangabuhi sang malinong bangud sa mga pamahog sa ila kabuhi kag mga gasinampaw-sampaw nga ginapangatubang nga kaso.
Tatlo sa apat ka lalaki ang nagpahayag nga ang una nila nga affidavit ang ginsumiter sa Office of the Ombudsman nga ginagamit subong sa imbestigasyon kay Romualdez kag iban pa.
Ginpanindugan man nila nga sang nag-atubang sila sa Ombudsman, ginpahayag nga ginpapirmahan sa ila ang mga affidavit nga napreparar na kag ginpahog nga pasakaan sang kaso kun indi magtuman.
Apang, ginpahayag sang “maleta boys” nga sila boluntaryo nga nagsulat kag nagpirma sang ila bag-o nga mga affidavit kahapon.
Ila man ginpahayag nga duha ka bulan nga ginbinag-binag nila nga bawion ang ila una nga mga statement.
Suno pa diri, ginakonsiderar naman sang iban nila nga mga kaupdanan nga mag-upod sa ila.
