Nagpabutyag si former House Speaker kag Leyte 1st District Rep. Ferdinand Martin Romualdez nga handa ini mag-atubang sa ginapatigayon nga preliminary investigation sang Office of the Ombudsman angot sa ginaalegar anomaliya sa mga flood control projects.
Suno kay Atty. Ade Fajardo, abogado ni Romualdez, pagasabton sang kongresista ang tanan nga alegasyon batok sa iya apang ginpahayag sini nga ang ila lamang ginahingyo amo ang patas nga proseso.
Suno kay Fajardo, wala sang plano si Romualdez nga magbiya sa pungsod kag padayon sini nga ginahimo ang katungdanan bilang tiglawas sang una nga Distrito sang Leyte.
Kadungan sini, liwat nga ginpanindugan sang kampo ni Romualdez nga wala sang ebidensya nga nagaangot sa mamalidha sa ginaalegar iregularidad sa flood control projects.
