Ginbawi sang anay suldado kag security aide ni former Ako Bicol Partylist Rep. Zaldy Co ang iya nauna nga testimoniya nga gin-alegar nagdul-ong sang minaleta nga kwarta sa balay ni anay House Speaker Martin Romualdez.
Sa iya bag-o nga affidavit, ginpahayag sini nga ginpilit lamang siya para hambalon nga nag-deliver ini sang kwarta kay Romualdez kabaylo sang kwarta kag scholarship para sa iya nga bata.
Suno kay Retired Marine Technical Sergeant Orly Guteza, ginpakadto siya nanday Sen. Rodante Marcoleta kag anay AnaKalusugan Party list Rep. Mike Defensor sa isa ka Japanese restaurant malapit sa Senado sa diin nagahulat ang isa ka preparado na nga affidavit.
Ginbuyagyag sini nga ang in-law ni Defensor nga ginkilala nga si “Mark” amo ang nagsulat sang draft.
Suno pa diri, nakita niya mismo kun paano ginbasa kag ginkay-o ni Marcoleta ang draft sang affidavit.
Madumduman nga sang Setyembre 25, 2025, nangin surprise witness si Guteza sa Senate Blue Ribbon Committee hearing nga ginpamunuan sadto ni Marcoleta.
Sang matapos ang hearing kag nadulaan siya sang komunikasyon sa mga tawo nga nagpromisa sa iya, nagapati si Guteza nga gingamit lamang siya.
Ang pag-recant ni Guteza ang kabahin sa mga ginatun-an nga ebidensya sang Office of the Ombudsman para sa posible nga ipasaka nga reklamo batok kay Romualdez.
